சமணம்

தொண்டை மண்டலத்தில் உள்ள சமணத்தலங்களில் முக்கியமானது சோழ இளவரசி 'குந்தவை'யின் பெயரால் அறியப்படுகின்ற 'குந்தவை ஜினாலயம்' என்னும் திருமலை சமணக் கோயில்கள். இம்முறை அங்கே செல்வதாக திட்டம். தாமரைக்கண்ணன் (புதுவை) வெளியூரிலிருந்து வந்து மேல்மருவத்தூரில் எனக்காகக் காத்திருந்தான். ஆண்டாள் என்னை ஊமை, செவிடு என்று திட்டி அழைக்கப் போவதில்லை என்றாலும் மார்கழியில் (28-12-22) அதிகாலை எழுந்து விட்டால் எனக்கு அவள் நினைவு வந்துவிடுகிறது. குளிர்ந்த நீரை வாரி தலையில் விட்டுக்கொண்டு பைக்கில் கிளம்பினேன்.

சென்னையிலிருந்து ஒரு நாள் பயணத்திட்டத்துடன் சென்று வரும் வரலாற்றிடங்கள் ஏராளமாக உள்ளன. சென்னைக்கு உள்ளே தேவாரப் பாடல் பெற்ற தலங்கள், 19ஆம் நூற்றாண்டு தொடக்கத்தில் போர்ச்சுக்கீசியர், பிரிட்டிஷாரால் கட்டப்பட்ட தேவாலயங்கள், பிரிட்டிஷ் கால கட்டிடங்கள் நிறைய இருக்கின்றன. வரலாற்று ஆர்வமுடையவர்களுக்கு சென்னையைப் போல பொருளியல் நிறைவும், நகரத்திற்கு உள்ளேயும் வெளியிலும் சென்று காண வாய்ப்புடைய பல வரலாற்றிடங்கள் இருக்கும் பெருநகரங்கள் அரிது.

சந்திரபிரபா தீர்த்தங்கரர் -திருப்பருத்திக்குன்றம்

பொ.யு. 640-ஆம் ஆண்டு புத்த சமய நூல்களை சேகரிக்க யுவான் சுவாங் இந்தியா வந்தார். இந்தியாவில் பல இடங்களுக்கு பயணித்து அவற்றை  குறிப்புகளாக எழுதி வைத்துள்ளார். அவர் காஞ்சிபுரம் வந்தபோது நூறு புத்த மடாலயங்களும் பத்தாயிரம் பௌத்த பிக்குகள் இருந்தார்கள் எனவும், காஞ்சியில் இருந்த எண்பதுக்கும் மேற்பட்ட ஆலயங்களில் பெரும்பாலானவை திகம்பர சமணக்கோயில்கள் என்றும் குறிப்பிடுகிறார். இந்த எண்ணிக்கை உத்தேசமானதாக கூட இருக்கலாம். ஆலயங்கள் என்று சொல்வது மடாலயங்களாகவும் இருக்கலாம். ஆனால் இந்தக் குறிப்புகள் சுட்டுவது போல் 7-ஆம் நூற்றாண்டில் புத்த, சமணர்கள் தென்னகங்களில் நிறைந்திருந்தனர் என்பது உண்மையையே.