Loading Posts...
Loading...
இயற்கை வளம் நிறைந்த நாடாகவும், முடியாட்சி நடைபெறும் நாடாகவும், இருப்பது மலேசியாவாகும். இங்கு மலாய் இனத்தவர்களும், சீனர்களும், இந்தியர்களும் வாழ்கின்றனர். கி.பி.10-ஆம் நூற்றாண்டில் சோழப் பேரரசனான இராசேந்திர சோழன் கெடாவின் மீது படையெடுத்து, வெற்றிகொண்டதாக வரலாறு குறிப்பிடும். பதினைந்தாம் நூற்றாண்டு முதல் சுல்தான்களின் ஆட்சி மலேசியாவில் நடைபெறுகின்றது.
போர்ச்சுக்கீசியர்கள் கி.பி.1511-ல் மலாக்காவை கைப்பற்றினர். ஆங்கிலேயர் பினாங்கினை முதன்முதல் கைப்பற்றி 1786-ஆம் ஆண்டு வேரூன்றினர். 1914-ஆம் ஆண்டிற்குள் மலேசியா முழுவதும் ஆங்கிலேயர் வசம் ஆனது. இரண்டாம் உலகப் போரின்பொழுது ஜப்பானியரின் கட்டுப்பாட்டில் மலேசியா இருந்தது. ஆங்கிலேயரின் ஆட்சிக்காலத்தில் அவர்களுக்கு பணிபுரியவும், மலேசியாவில் சாலைகள் அமைக்கவும், நிலங்களைத் திருத்திப் பயிரிடவும், காபித்தோட்டம், ரப்பர்த்தோட்டம், கரும்புக்காடுகளில் பணிபுரியவும் ‘சஞ்சிக்கூலிகளாக’ இந்தியாவிலிருந்து இந்தியர்களை அழைத்து வந்தனர். இந்தியர்களுள் பெரும்பான்மையினர் தமிழர்களாவர்.